Portuqaliya millisində Ronaldu QALMAQALI: Federasiya rəhbəri təcili Kopenhagenə yollandı

Portuqaliya Futbol Federasiyasının rəhbəri Pedru Proensa ulduz futbolçu Kriştianu Ronaldu ilə millinin baş məşqçisi Jorji Jezuş arasındakı münaqişəni yoluna qoymaq məqsədilə Kopenhagenə yollanıb. Oxu.Az "A Bola" nəşrinə istinadən xəbər verir ki, Jezuş əvvəlcədən 41 yaşlı Ronaldunu Millətlər Liqası çərçivəsində Norveçlə keçirilən səfər matçında əsas heyətdə buraxmağı planlaşdırmayıb. Baş məşqçi hücumçuya ikinci hissədə təxminən yarım saat vaxt vermək istəsə də, Ronaldu ehtiyat oyunçular skamyasında qalıb. Bu, son 18 ildə onun rəsmi oyunda meydana çıxmadığı ilk hal kimi tarixə düşüb. Final fitindən dərhal sonra Ronaldu azarkeşlərə təşəkkür etmədən birbaşa paltardəyişmə otağına yollanıb. Sentyabrın 29-da isə o, trenajor zalında fərdi şəkildə məşq edib. Qeyd edək ki, sabah Portuqaliya Millətlər Liqasında Danimarka ilə qarşılaşacaq. İki turdan sonra portuqaliyalılar altı xalla A4 qrupuna liderlik edir və həm danimarkalıları, həm də norveçliləri üç xal qabaqlayırlar.