Bakıda kuryoz olay: Yanğına baxarkən avtomobilin vurduğu şəxsin vəziyyəti açıqlandı

Ötən gün Bakının Nərimanov rayonunda avtomobilin vurduğu piyadanın vəziyyəti açıqlanıb. Bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib: "21.09.2026-cı il tarixində saat 18:55-də Respublika Təcili və Təxirəsalınmaz Tibbi Yardım Mərkəzinə Bakı şəhəri, Nərimanov rayonu, Təbriz küçəsi ərazisindən çağırış qeydə alınıb. Çağırış ünvanına təcili tibbi yardım briqadası göndərilib. Təcili tibbi yardım briqadası tərəfindən 1 nəfər (kişi) Kliniki Tibbi Mərkəzə hospitalizasiya olunub. Qamış sümüyünün sınığı diaqnozu təyin edilən pasiyentə zəruri tibbi xidmətlər göstərilib. Sözügedən şəxs ailə üzvlərinin yazılı iltizamnaməsi əsasında 21.09.2026-cı il tarixində saat 21:30-da özəl tibb müəssisəsinə təxliyə olunub". Qeyd edək ki, zərərçəkən ötən gün Bakının Nərimanov rayonunda, Ə.Əliyev küçəsində yerləşən 16 mərtəbəli yaşayış binasında baş verən yanğını izləyərkən avtomobillə vurulub.