Qlobal istiləşmə təhlükəsi: İqlim dəyişikliyi bərpaolunmaz fəsadlara səbəb ola bilər

Birləşmiş Millətlər Təşkilatının (BMT) təqdim etdiyi yeni hesabatda bildirilir ki, dünya 1.5 dərəcəlik qlobal istiləşmə həddinə çox yaxınlaşıb və yaxın illərdə bu göstərici mütləq şəkildə aşılacaq. Oxu.Az xəbər verir ki, bu barədə "Bloomberg" nəşri məlumat yayıb. Sənəddə diqqətə çatdırılır ki, indiki şəraitdə başlıca hədəf mövcud həddi qorumaqdan daha çox, maksimal temperatur artımı dövrünün onilliklərlə uzanmasına mane olmaqdır. Tədqiqatçıların proqnozlarına görə, indiki iqlim strategiyası dəyişməz qalarsa, temperaturun 2.6 dərəcəyə qədər yüksəlməsi gözlənilir. Ən nikbin ehtimalda isə bu rəqəm 1.8 dərəcə olacaq. Sənədin həmmüəlliflərindən olan professor Debra Roberts vurğulayıb ki, Yer kürəsi həlledici dövrdən keçir və kəskin temperatur artımının müddəti bilavasitə ölkələrin görəcəyi təxirəsalınmaz tədbirlərə bağlıdır. İqlim vəziyyətini təkrar stabilləşdirmək məqsədilə qazıntı yanacaqlarının istifadəsindən yaranan emissiyaları əhəmiyyətli dərəcədə məhdudlaşdırmaq və atmosferi karbondan intensiv şəkildə təmizləmək lazımdır. Mütəxəssislər həyəcan təbili çalırlar ki, gələcəkdə istilik göstəriciləri ensə də, okean səviyyəsinin yüksəlməsi kimi müəyyən nəticələr artıq bərpaolunmaz ola bilər. Hesabatda göstərilir ki, zərərli qaz tullantılarının ixtisarı ilə cəmiyyətlərin yeni iqlim şərtlərinə adaptasiyası prosesləri eyni vaxtda, bir-birini dəstəkləyəcək şəkildə həyata keçirilməlidir. İqlimşünas Riçard Betts isə xüsusi olaraq vurğulayıb ki, sadəcə karbonun tutulması və saxlanması texnologiyalarına bel bağlayaraq zərərli yanacaq emissiyalarını azaltmaqdan boyun qaçırmaq qətiyyən yolverilməzdir.