FIFA-da qiyam: Üç böyük konfederasiya Canni İnfantinoya qarşı birləşdi

Avropa Futbol Assosiasiyaları İttifaqı (UEFA), Şimali və Mərkəzi Amerika və Karib Hövzəsi Ölkələri Futbol Konfederasiyası (KONKAKAF) və Asiya Futbol Konfederasiyası (AFC) Beynəlxalq Futbol Federasiyaları Assosiasiyasının (FIFA) prezidenti Canni İnfantinonun fəaliyyətinin müstəqil şəkildə araşdırılmasını tələb edib. Buna səbəb onun dünya çempionatının yayım hüquqlarının bir hissəsini özəl investorlara satmaq təklifidir. Oxu.Az xəbər verir ki, bu barədə hər üç təşkilatın UEFA-nın rəsmi saytında dərc olunmuş birgə açıq məktubunda bildirilir. Bir müddət əvvəl İnfantinonun dünya çempionatı hüquqlarının bir hissəsini özəl investorlara satmaq niyyəti məlum olmuş, lakin futbol ictimaiyyətinin kəskin tənqidindən sonra o, "FIFA Forward Enterprise" layihəsindən imtina etmişdi. Tənqidlər fonunda FIFA rəhbərliyi Mərakeşdə İnfantino və idarə heyəti üzvlərinin iştirakı ilə təcili görüş keçirib. Görüş zamanı təşkilatın vitse-prezidentləri hazırkı rəhbərə etimad göstərdiklərini bildirib, FIFA isə uğursuz layihədən sonra öz nüfuzunu bərpa etmək istədiyini açıqlayıb. Həmçinin, FIFA bütün üzv təşkilatlara məktub göndərərək yol verdiyi səhvləri etiraf edib. "Futbol dünyada ən böyük ümumi ehtirasdır, o, heç bir fərdə və ya quruma məxsus deyil", - deyə bəyanatda vurğulanır. "O, oyunçulara, azarkeşlərə, klublara, üzv assosiasiyalara və onun gələcəyini qorumaq həvalə edilmiş bütün qurumlara məxsusdur. Məhz bu ruhda biz, öz üzvlərimizi təmsil edən konfederasiyalar olaraq, bu gün vahid cəbhədə çıxış edirik. Etimad yalanla sarsıldıqda, bir şəxs özünü ona səlahiyyət verən kollektivdən üstün tutduqda, bu vəzifə borcu artıq yerinə yetirilmir. Söhbət daha fundamental məsələdən gedir: oyunun dürüstlüyündən və rəhbər seçilənlərin vicdanlılığından. Futbolda liderlik sahiblik demək deyil. Məsələ hakimiyyəti əldə saxlamaq və ya onu tələb etməkdə deyil. Bu, rəhbərliyi etibar etmiş futbol ailəsi qarşısında bir borcdur". Təşkilatlar İnfantinonun hərəkətlərinin yoxlanılmasını tələb edərək qeyd ediblər ki, FIFA müəyyən nəticələrdə maraqlı ola biləcəyi üçün bu prosesdə heç bir rol oynamamalıdır. "FIFA-nın öz vitse-prezidentlərinə və 211 üzv assosiasiyaya göndərdiyi son məktubunda prosesdə səhvlərə yol verildiyi etiraf olunur. Məktubda bu hal sadəcə anlaşmazlıq kimi qiymətləndirilsə də, əslində, ortada yanlış qərar var idi. Təşkilat təklifin özünün mahiyyətcə səhv olduğunu qəbul etməyib. Hələ də etiraf olunmur ki, dünya çempionatında iştirak payını satmaq cəhdi kobud bir anlaşmazlıq - sadəcə prosedur səhvi deyil, FIFA-nın xidmət etdiyi institutlara olan etimadın fundamental şəkildə pozulması idi. O, həmçinin bu hadisələrlə bağlı FIFA şurasına tam hesabat təqdim edəcəyini öhdəsinə götürüb, lakin yenə də qəbul etməyib ki, belə açıq-aşkar sağlam düşüncənin olmadığı şəraitdə düzgün idarəetmə bu yoxlamanın FIFA, onun heyəti və ya futbolda maraqlı olan hər hansı tərəf tərəfindən deyil, tamamilə müstəqil üçüncü tərəf tərəfindən aparılmasını tələb edərdi. FIFA administrasiyası yoxlamanın aparılmasında heç bir rol oynamamalıdır", - deyə məktubda bildirilir. Qurumlar həmçinin Mərakeşdə keçirilən görüşü kəskin tənqid ediblər, çünki oraya bütün icraiyyə komitəsi deyil, yalnız FIFA-nın rəhbər komitəsi dəvət olunub. "Bu son görüş sadəcə narahatlıqları artırır və bizi indiki məqama gətirib çıxaran həmin davranış modelinin davamıdır. Bu, oyunun qoruyucusunun deyil, oyunun ona hesabat verməli olduğunu düşünən bir şəxsin davranışıdır. Hesabatlılığın zəruri olduğu yerdə sükut, açıqlığın zəruri olduğu yerdə isə məsafə hökm sürür. Bunlar futbol təşkilatının rəhbərliyinə yaraşan xüsusiyyətlər deyil. Məhz buna görə biz belə bir mövqe nümayiş etdirdik: öz şıltaqlığımızla və ya təkbaşına deyil, birlikdə, xidmət etdiyimiz oyuna olan borc hissindən irəli gələrək. Futbolun gücü həmişə onun birliyində olub. Biz indi də bu birliyə hörmət etməyə, futbolu idarə etməyə çalışan deyil, ona xidmət edən bir liderliyə can atmağa çağırırıq", - deyə tərəflər öz müraciətlərini yekunlaşdırıblar.