Ukraynanın əsas hədəflərindən biri budur - "Velt"
Ukrayna işğal altındakı Krıma və Rusiya ordusunun logistikasına təzyiqi artıraraq yanacaq infrastrukturu və təchizat marşrutlarına sistemli zərbələr endirir.
Axar.az xəbər verir ki, bu barədə “Velt” nəşri yazıb.
Məlumata görə, bu hücumların nəticələri artıq o qədər hiss olunur ki, yarımadada yanacaq problemləri barədə hətta Kremlin nümayəndələri də danışmağa məcbur qalırlar.
Ukrayna Baş Qərargahının məlumatına əsasən, bazar ertəsindən çərşənbə axşamına keçən gecə pilotsuz uçuş aparatları Rusiyanın cənubundakı ən böyük neft tədarükü stansiyalarından birinə, eləcə də işğal olunmuş Krımdakı neft bazasına və digər yanacaq obyektlərinə hücum edib.
Nəşr qeyd edir ki, bu zərbələr Kiyevin Rusiyaya maksimum iqtisadi və hərbi zərər vurmağa yönəlmiş strategiyasının bir hissəsidir.
Ukraynanın əsas hədəflərindən biri Rusiyanı Ukraynanın cənubundakı işğal olunmuş ərazilərlə, xüsusilə də Krımla birləşdirən quru dəhlizidir. Eyni zamanda, Moskvanın hələ 2022-ci ildə ilhaq etdiyini elan etdiyi Donetsk, Luqansk, Xerson və Zaporojye vilayətlərini tam nəzarətə götürmək perspektivi getdikcə daha az real görünür.
