AFFA təsdiqlədi: Tovuz təmsilçisi Avropaya buraxılmayacaq

AFFA "Turan Tovuz"un 2026/2027 mövsümündə UEFA bayrağı altında keçirilən yarışlardan uzaqlaşdırıldığını təsdiqləyib. Oxu.Az xəbər verir ki, bu barədə qurum rəsmi məlumat yayıb. AFFA-nın yaydığı məlumata əsasən, bu cəzanın kökləri keçmişə dayanır. Belə ki, AFFA İntizam Komitəsinin "Turan Tovuz" futbolçularının danışılmış oyunlarda iştirakı səbəbindən cəzalandırılması barədə 13 dekabr 2019-cu il tarixli qərarını əsas götürən UEFA, klubun 2026/2027-ci illər mövsümündə Konfrans Liqasında iştirakına hüquqi qiymət verilməsi üçün işi birbaşa olaraq UEFA-nın Apellyasiya orqanına göndərib. UEFA Apellyasiya orqanının 2 iyun 2026-cı il tarixli qərarına əsasən, Tovuz təmsilçisi UEFA Konfrans Liqasının 2026/2027-ci illər mövsümündə iştirak hüququndan məhrum edilib. Xatırladaq ki, hələ 2019-cu ildə I Divizionda çıxış edən zaman danışılmış oyunlar qalmaqalında adı hallanan "Turan Tovuz"un 7 futbolçusuna - Sənan Qocayev, Misir Rüstəmov, Emin Bağırov, İlkin Sadıqov, Rüfət Məmmədov, Eltay Tağıyev və Şahin Quluzadəyə futbola aid bütün növ fəaliyyətlərlə məşğul olmaq üçün qəti qadağa tətbiq edilmişdi.