Alla Puqaçovanın nəvəsinin sata bilmədiyi malikanənin real qiyməti açıqlandı

Alla Puqaçovanın nəvəsi Nikita Presnyakova hədiyyə etdiyi dördmərtəbəli malikanənin faktiki dəyərinin təxminən 90-120 milyon rubl (təxminən 1.7 - 2.2 mln. manat) təşkil etdiyi bildirilir. Oxu.Az xəbər verir ki, bu barədə rieltor Yuliya Yusova "Abzats" nəşrinə açıqlamasında deyib. Mülk İstra su anbarının sahilindəki Malıe Berejki kottec qəsəbəsində yerləşir. Puqaçova bu ərazini hələ 1990-cı illərdə alıb. Əsas binanın sahəsi 760 kvadratmetrdir. Evdə kinoteatr, bilyard otağı, hamam və hovuz mövcuddur. Bundan əlavə, ərazidə işçilər üçün ev və dayanacağı olan qaraj kimi köməkçi tikililər də var. Obyektin həmçinin bələdiyyədən icarəyə götürülmüş xüsusi estakadası və sahil xətti mövcuddur. Daşınmaz əmlak Primadonnanın nəvəsi Nikita Presnyakovun adına rəsmiləşdirilib. O, malikanəni 2025-ci ilin sentyabrından bəri satmağa çalışır. Əvvəlcə qiymət 152 milyon rubl olsa da, daha sonra 130 milyona endirilib. 2025-ci ilin sonunda mülk daha 5 milyon rubl ucuzlaşıb. 2026-cı il mayın 14-də villanın artıq 110 milyon rubla təklif edildiyi məlum olsa da, hələ də alıcı tapılmır. Yusovanın sözlərinə görə, satışın uğursuz olmasının səbəbi elit mənzil alıcılarının seçimlərinin dəyişməsidir. Hazırda alıcılar təkcə obyektin statusunu deyil, həm də onun likvidliyini, texniki vəziyyətini, hüquqi şəffaflığını və saxlama xərclərini əsas götürürlər. "Alıcıların marağına təsir edən ciddi amillərdən biri də estakada ilə bağlı vəziyyətdir. Belə ki, "Rosprirodnadzor" orada qanunpozuntuları aşkar edib: obyekt qeydiyyata alınmayıb, müvafiq icazələri yoxdur və qurumun məlumatına görə, su hövzəsi üzrə hərracların keçirilməsinə mane olur", - deyə ekspert əlavə edib. Bundan başqa, rieltor qeyd edib ki, bu formatda olan malikanələrə artıq tələbat azalıb. Belə nəhəng bir obyektin saxlanılması davamlı və bahalı investisiya tələb etdiyindən, alıcılar getdikcə daha yığcam və funksional evlərə üstünlük verirlər.