Yaponiyada ayı hücumlarına görə bütün robot-canavarlar satılıb

Yaponiyanın "Ohta Seiki" şirkəti ölkədə ayı hücumlarının rekord həddə çatması fonunda "Monster Wolf" (Canavar canavar) adlı robot-canavarlara tələbatın kəskin artması ilə üzləşib. Oxu.Az xəbər verir ki, bu barədə "Independent" nəşri xəbər yayıb. Şirkət rəhbəri Yuci Otanın sözlərinə görə, ilin əvvəlindən bəri "Monster Wolf" üçün təxminən 50 sifariş alınıb. Halbuki belə satış həcmi adətən bütün bir il ərzində qeydə alınırdı. Robot-canavara marağın artması vəhşi ayıların hücumlarının çoxalması ilə üst-üstə düşüb. 2025-2026-cı illərdə ölkədə ayıların 13 ölümcül hücumu qeydə alınıb. Bundan əlavə, təhlükəli heyvanların görünməsi ilə bağlı məlumatların sayı 50 mini ötüb ki, bu da əvvəlki rekorddan iki dəfə çoxdur. Ayılar mütəmadi olaraq yaşayış evləri, məktəblər, mağazalar və isti bulaqların yaxınlığında müşahidə olunur. Bu fonunda hakimiyyət orqanları ayıların ovlanmasını əhəmiyyətli dərəcədə artırıblar. İl ərzində 14.6 mindən çox ayı məhv edilib ki, bu da əvvəlki illə müqayisədə təxminən üç dəfə çoxdur. "Monster Wolf" - yırtıcı görünüşlü avtomatik qorxuducu qurğudur. Cihaz süni xəz, qırmızı işıldayan gözlər, hərəkət sensorları və təxminən 50 müxtəlif səs yayan dinamiklərlə təchiz olunub. İnsan və elektron səslər də daxil olmaqla, bu siqnallar bir kilometrədək məsafədən eşidilir. Qeyd edək ki, "Monster Wolf" 2016-cı ildə kənd təsərrüfatı sahələrini maral, qaban və ayılardan qorumaq üçün hazırlanıb. O zaman layihə qeyri-adi bir eksperiment kimi qəbul edilsə də, hazırda şirkətin əsas müştəriləri fermerlər, qolf-klub sahibləri və kənd ərazilərində yaşayan sakinlərdir.