Gizli ekoloji fəlakət? - ABŞ-də aqressiv soxulcanlar yayılır

ABŞ əhalisi aqressiv invaziv soxulcan növü sayılan Asiya "tullanan qurdunun" yayılması barədə xəbərdar edilib. Bu növ həmçinin "dəli" və ya "ilan" qurdu kimi də tanınır. Oxu.Az-ın məlumatına görə, bu barədə xəbərdarlıq Kolorado ştatının kənd təsərrüfatı departamentinin saytında yerləşdirilib. Kolorado Kənd Təsərrüfatı Departamentinin Bitkiçilik üzrə şöbə müdiri Vondirad Gebrunun sözlərinə görə, ştat ərazisində bu qurdların çoxalmasının qarşısının alınması yerli bitki örtüyünü və torpağın sağlamlığını qorumaq üçün xüsusi əhəmiyyət kəsb edir. Qurumdan o da bildirilib ki, sözügedən növ torpağın səthindəki üzvi maddələri çox sürətlə udur. Nəticədə çöl çiçəkləri, meşə ekosistemləri və yerli flora üçün həyati əhəmiyyət daşıyan vacib üst torpaq qatı məhv olur. Xüsusilə hiperaktiv olduqları mövsümdə bu qurdlar bitkilərin kök sistemini zədələyərək torpağın sürətlə qurumasına səbəb olur. Bu vəziyyət qida yoxsulluğu paradoksuna gətirib çıxarır, torpağın tərkibində lazımi kimyəvi elementlər mövcud olsa da, onlar bitkilərin mənimsəməsi üçün əlçatmaz vəziyyətə düşür.