Hansı yaşda nə yeməli? - Rusiyalı alimdən beyin sağlamlığı üçün "yaş xəritəsi"

Yaşlandıqca beyin sağlamlığını qorumaq üçün qidalanma vərdişlərində prioritetləri dəyişmək zəruridir. Xüsusilə 60 yaşdan sonra damarları qoruyan və maddələr mübadiləsini dəstəkləyən xüsusi qidalanma rejiminə keçid vacib hesab olunur. Oxu.Az xəbər verir ki, bu barədə Rusiya Elmlər Akademiyasının müxbir üzvü, biologiya elmləri doktoru Aleksey Moskalyov gazeta.ru nəşrinə müsahibəsində bildirib. Alimin fikrincə, müxtəlif yaş dövrlərində beyin üçün qidalanma prioritetləri aşağıdakı kimi dəyişməlidir: Gənclik dövründə: Əsas diqqət orqanizmdəki çatışmazlıqların (B qrupu vitaminləri, D vitamini, maqnezium, dəmir və yod) qarşısını almağa yönəlməlidir. Orta yaşlarda: Sadalananlara əlavə olaraq, insulin müqavimətinin (beyin hüceyrələrinin insulinə həssaslığının azalması) qarşısı alınmalıdır. 60 yaşdan sonra: Beyni qidalandıran qan damarlarını qorumaq və maddələr mübadiləsini sabit saxlamaq əsas hədəf olmalıdır. 80 yaşdan sonra: Bu dövrdə əsas məqsəd yetərsiz qidalanma (malnutrisiya) və bədənin susuzlaşmasına (dehidratasiya) yol verməməkdir. Bundan əlavə, A.Moskalyov orucun beyin sağlamlığına müsbət təsir göstərdiyini qeyd edib. O bildirib ki, 2024-2025-ci illərdə aparılan klinik sınaqların nəticələrinə görə, aralıqlı oruc (intermittent fasting) beynin bioloji qocalmasını yavaşlada və koqnitiv (idrak) funksiyaları yaxşılaşdıra bilər. Lakin alim bunun hələ tam sübut olunmuş bir üsul olmadığını xatırladaraq, pəhriz məhdudiyyətləri və ya sadəcə sağlam qidalanma seçimini oxucuların ixtiyarına buraxıb.