İnvestisiyaların dövlət tərəfindən alınması ilə bağlı qanuna mühüm dəyişiklik

İnvestisiyalar investordan dövlət tərəfindən alınmasının yeni əsası müəyyənləşir. Oxu.Az xəbər verir ki, sözügedən məsələ Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirəyə çıxarılan "İnvestisiya fəaliyyəti haqqında" Qanuna təklif edilən dəyişiklik layihəsində əksini tapıb. Mövcud qanunvericiliyinə görə, investisiyalar investordan dövlət tərəfindən iki əsasla - dövlət ehtiyacları üçün və rekviziya məqsədilə (təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda müvafiq dövlət orqanlarının qərarı ilə cəmiyyətin mənafeləri üçün) alına bilər. Hər iki halda investisiyanın dəyəri bu kompensasiya ödənişinin edilməsi yolu ilə investora ödənilir. Təklif olunan dəyişiklikdə isə investisiyanın dövlət tərəfindən alınmasının yeni əsası müəyyənləşir. Belə ki, strateji əhəmiyyətə malik investisiyalara münasibətdə Azərbaycan dövlətinin və xalqının mənafelərinə zərər vuran və ya ölkənin milli maraqlarına zidd olan müstəsna halların qarşısını almaq məqsədilə investisiyalar dövlət tərəfindən alınacaq. Qanun layihəsi strateji əhəmiyyətə malik olan investisiyaların Azərbaycan dövlətinin və xalqının mənafelərinə zərər vuran və ya milli maraqlara zidd olan müstəsna halların qarşısını almaq məqsədilə dövlət tərəfindən alınmasının hüquqi əsasını formalaşdırır. Qeyd olunan məqsəd üçün investisiyaların alınması ümumi qaydada, yəni investisiyaların dövlət tərəfindən alınması əvəzində investorlara kompensasiya ödənilməklə həyata keçirilə biləcək. Həmçinin qeyd olunan məqsəd üçün strateji əhəmiyyətə malik olan investisiyaların dövlət tərəfindən alınması Azərbaycan qanunları ilə həyata keçirilə biləcək. Məlik Məlikov