"Reuters": İranda etirazlarda ölənlərin sayı beş min nəfərə çatıb

İranda genişmiqyaslı etiraz aksiyaları zamanı həlak olanların sayı 5 000 nəfərə çatıb, onlardan təxminən 500-ü təhlükəsizlik qüvvələrinin əməkdaşlarıdır. Oxu.Az bildirir ki, bu barədə "Reuters" agentliyi adı açıqlanmayan iranlı məmura istinadən xəbər verir. Onun sözlərinə görə, hakimiyyət "günahsız iranlılar"ın qətlində "terrorçuları və silahlı üsyançıları" ittiham edib. Məmur qeyd edib ki, ən ağır toqquşmalar və ən çox ölüm halı separatçıların fəaliyyət göstərdiyi İranın şimal-qərbində qeydə alınıb. Daha əvvəl HRANA hüquq müdafiə qrupu etirazlarda ölənlərin sayının 3 308 nəfərə çatdığını bildirmişdi. Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb. İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.