Donald Tramp FIFA Sülh Mükafatına layiq görüldü

ABŞ Prezidenti Donald Tramp futbol üzrə dünya çempionatının (DÇ-2026) püşkatma mərasimi çərçivəsində FIFA Sülh Mükafatına layiq görülüb.
Bakupost.az Oxu.Az-a istinadla xəbər verir ki, bu il təsis olunmuş mükafatı Trampa FIFA prezidenti Canni İnfantino təqdim edib.
Mərasim zamanı çıxış edən D.Tramp Ukraynada münaqişənin həlli yolunun tezliklə tapılmasını gözlədiyini deyib.
"Mən səkkiz müharibəyə son qoydum və doqquzuncu müharibənin sonu yaxınlaşmaqdadır. Mənə mükafatlar lazım deyil, mən həyat xilas etməliyəm. Mən milyonlarla insanı xilas edirəm və buna davam etmək istəyirəm", - deyə o bildirib.




11:44
ABŞ Prezidenti Donald Tramp bu gün futbol üzrə dünya çempionatının (DÇ-2026) püşkatma mərasimində iştirak edəcək.
Oxu.Az xəbər verir ki, bu barədə "Politico" nəşri tədbirin proqramına istinadən məlumat yayıb.
Məlumata görə, tədbirdə ABŞ lideri FIFA Sülh Mükafatını almaq üçün səhnəyə çıxacaq.
Bildirilir ki, iki saat davam edəcək tədbir Trampın sevimli opera müğənnilərindən olan Andrea Boçellinin çıxışı ilə başlayacaq. Daha sonra FIFA prezidenti Canni İnfantino Trampı Sülh Mükafatı laureatı kimi təqdim edəcək. ABŞ-nin dövlət başçısının mükafatı aldıqdan sonra səhnədə çıxış edəcəyi gözlənilir.
Məlumata görə, püşkatma mərasimi ABŞ liderinin sevdiyi "YMCA" hitinin "Village People" qrupunun ifasında səsləndirilməsi ilə yekunlaşacaq.
Qeyd edək ki, DÇ-2026-da ilk dəfə 48 komanda iştirak edəcək. Turnir iyunun 11-dən iyulun 19-dək ABŞ, Kanada və Meksikada keçiriləcək.