İstanbulda güclü yağış həyatı iflic etdi: 40-dan çox təyyarə başqa hava limanlarına yönləndirildi

Türkiyənin İstanbul şəhərində əlverişsiz hava şəraiti uçuşlarda fasilələrə səbəb olub. İstanbul Hava Limanına eniş edə bilməyən 43 təyyarə alternativ aerportlara yönləndirilib. Oxu.Az NTV telekanalına istinadən xəbər verir ki, əlverişsiz hava şəraiti İstanbul Hava Limanı və Sabiha Gökçen Hava Limanında uçuşların həyata keçirilməsində problemlər yaradıb. Türkiyənin Nəqliyyat və İnfrastruktur Nazirliyinin məlumatına görə, daxili reyslər üzrə 16 təyyarə Ankara Esenboğa, 8-i Sabiha Gökçen, 10-u İzmir Adnan Menderes, 2-si Balıkesir Koca Seyit, 2-si Çanaqqala, 1-i isə Antalya hava limanına yönləndirilib. Beynəlxalq reyslərdən 1 təyyarə İrana, 2-si Bolqarıstana, 1-i isə Yunanıstana istiqamətləndirilib.