İspaniya futbolunda qalmaqal: Karvaxalın "Xetafe"yə keçidi maaşının azlığına görə qeydiyyata alınmadı

"Real Madrid"in sabiq müdafiəçisi və kapitanı Dani Karvaxalın "Xetafe"yə transferi İspaniya La Liqası tərəfindən dayandırılıb. Buna səbəb futbolçu üçün bəyan edilən əməkhaqqının şübhə doğuracaq dərəcədə aşağı olmasıdır. Oxu.Az xəbər verir ki, bu barədə "L'Équipe" nəşri məlumat yayıb. La Liqanın İqtisadiyyat Komitəsi təklif olunan şərtləri maliyyə feyr-pley qaydalarının ehtimal olunan pozuntusu kimi qiymətləndirərək müqaviləni qeydiyyata almaqdan imtina edib. "Xetafe" müdafiəçinin illik maaşını təxminən 400 min avro olaraq göstərən sənədlər təqdim edib. Lakin La Liqa rəsmiləri Karvaxalın "Real Madrid"də ildə təqribən 10 milyon avro qazandığını əsas gətirərək müraciəti rədd ediblər. Belə səviyyəli bir oyunçunun rəsmi gəlirinin 96% azalması gizli ödənişlərlə bağlı şübhələr yaradıb. La Liqanın xərclərə nəzarət qaydaları klubların qeyri-rəsmi kommersiya müqavilələri və ya imic hüquqları vasitəsilə maaş limitindən yayınmasının qarşısını almaq üçün tanınmış futbolçulara dair baza qiymətləndirmələrini nəzərdə tutur. La Liqa rəhbərliyi "Mançester Siti"nin ittiham olunduğu hallara bənzər sxemlərdən qaçmağa çalışır. Xatırladaq ki, həmin məsələdə Roberto Mançininin BƏƏ klubu ilə məsləhətləşmə müqaviləsi vasitəsilə əlavə ödənişlər aldığı iddia edilirdi. "Xetafe" müqavilə şərtlərinə liqanın iqtisadi tələblərinə uyğun şəkildə yenidən baxmayana qədər bu transfer sual altında qalacaq.