Filippin prezidentinin əmisi oğlunun həbsinə order verildi: 118 milyon dollarlıq ittiham

Filippinin korrupsiyaya qarşı mübarizə məhkəməsi Nümayəndələr Palatasının keçmiş spikeri və ölkənin hazırkı prezidenti Ferdinand Markosun əmisi oğlu Martin Romualdesin həbsi barədə order verib. O, xüsusilə külli miqdarda dövlət vəsaitini mənimsəməkdə ittiham olunur. Oxu.Az xəbər verir ki, bu barədə "Reuters" məlumat yayıb. Martin Romualdesin həbsi ilə bağlı order dağıdıcı daşqınlarla mübarizəyə yönəldilmiş dövlət vəsaitlərinin mənimsənilməsi üzrə genişmiqyaslı sxem ətrafında yaranmış korrupsiya qalmaqalının davamıdır. Ötən il aparılan yoxlamalar zamanı ümumi dəyəri 545 milyard Filippin pesosu (təxminən 9 milyard dollar - red.) olan daşqınlarla mübarizə üzrə 10 000-dən çox layihə aşkar edilərək nəzarətə götürülüb. Bəzi layihələr üzrə işlər ciddi pozuntularla, şişirdilmiş qiymətlərlə həyata keçirilib və ya ümumiyyətlə, yalnız kağız üzərində mövcud olub. İfşadan sonra yüksəkvəzifəli məmurlar istefa verib və işdən çıxarılıb, həmçinin kütləvi həbslər həyata keçirilib. İstintaqın versiyasına görə, Romualdes cinayət sxeminin təşkilatçılarından biri olub və bundan ən azı 118 milyon dollar əldə edib. Filippin Prezidenti Ferdinand Markos üzə çıxarılan mənimsəmələrin miqyasını "dəhşətli" adlandırıb və korrupsiyaya qarşı kampaniyanın hətta onun öz qohumlarından da yan keçməyəcəyini bildirib. Martin Romualdes özü isə günahını inkar edir. Təqsirli bilinəcəyi təqdirdə prezidentin əmisi oğlunu ömürlük həbs cəzası gözləyir. Onun girov müqabilində azadlığa buraxılmaq hüququ yoxdur.