İndira Hacıyeva: "Qarabağ və Şərqi Zəngəzurda etimad və imkanlar yenidən qurulur"

"Qarabağ və Şərqi Zəngəzurda biz, sadəcə, əraziləri yenidən qurmuruq. Yenidənqurma yalnız yolların və binaların tikintisi demək deyil. Bu, etimadın, imkanların və gündəlik həyatın yenidən qurulmasıdır". Oxu.Az xəbər verir ki, bu fikirləri gənclər və idman nazirinin müavini İndira Hacıyeva Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 2024-26-cı illər üzrə sədrliyi çərçivəsində qurumun Gənclər Şurasının 9-cu iclasında deyib. O bildirib ki, Azərbaycan postmünaqişə bölgələrində doqquz yeni şəhər və yüzlərlə yaşayış məntəqəsi inşa edir: "İnanırıq ki, hər bir icma təkcə bərpa olunmağa deyil, həm də inkişaf etmək fürsətinə layiqdir. Biz yaşıl enerji, rəqəmsal innovasiyalar və insanmərkəzli şəhərsalma prinsipləri vasitəsilə insanların necə yaşaya, işləyə, təhsil ala və inkişaf edə biləcəyini yenidən düşünürük. Bu gün artıq 85 minə yaxın insan bu yenidən qurulmuş ərazilərdə yaşayır, işləyir və təhsil alır". Nazir müavini qeyd edib ki, innovasiya və modernləşməyə sərmayə qoyarkən eyni dərəcədə vacib olan bir həqiqət də unudulmur: "Kimliyini itirən şəhər sonda ruhunu da itirir. Buna görə də mədəni irsin qorunması, ənənələrin yaşadılması və sosial həmrəyliyin gücləndirilməsi dayanıqlı şəhər inkişafının ayrılmaz hissəsidir. Bəlkə də bugünkü görüşün ən mühüm mesajı budur: Gənclərə tərəfdaş kimi etibar ediləndə onlar yalnız tənqid gətirmirlər. Onlar həll yolları gətirirlər. Yaradıcılıq gətirirlər. Təcili hərəkət ruhu gətirirlər. Və bizə xatırladırlar ki, şəhər inkişafı yalnız infrastrukturdan ibarət deyil. Bu, insanlardan ibarətdir. Bu, ləyaqətdən ibarətdir. Bu, hər bir uşağın qurduğumuz gələcəyin bir parçası olduğunu hiss edib-etməməsindən ibarətdir".