Məşhur şirkətin inşa etdiyi binada BƏDBƏXT HADİSƏ: Ölən var

Bakıda çoxmərtəbəli yaşayış binalarının tikintisi ilə məşğul olan şirkət cərimə olunub. Oxu.Az "Teleqraf"a istinadən xəbər verir ki, "Teymuroğlu Construction" Mənzil Tikinti Kooperativində (MTK) Əmək və Əhalinin Sosial Müdafiəsi Nazirliyi yanında Əmək Müfəttişliyi Xidmətinin Bakı şəhər İdarəsi araşdırma aparıb. Məlum olub ki, MTK-nın işçisi Ə.Əsgərxanov əmək funksiyalarının icrası zamanı bədbəxt hadisə nəticəsində ölüb. Təhqiqat zamanı Əsgərxanovun istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsi hallarından icbari sığortalanmasının təmin edilmədiyi məlum olub. Beləliklə Mənzil Tikinti Kooperativi tərəfindən İnzibati Xətalar Məcəlləsinin 469-1-ci maddəsi ilə nəzərdə tutulan inzibati xəta törədilib. MTK-nın nümayəndəsi bildirib ki, işçi ilə əmək müqaviləsi 2026-cı il tarixdə bağlansa da, onun işə çıxma vaxtı başqa zamana təsadüf edib: "Sığorta müqaviləsinin bağlanılmasına çalışılsa da, sistemdəki xəta, "Atəşgah Siğorta"nın ödənişi nağd qaydada tələb etməsi səbəbindən müqavilə fərqli tarixdə bağlanılıb. Hadisə ehtiyatsızlıq nəticəsində baş verib. Şirkət tərəfindən vətəndaşın ailəsinə lazımı yardım edilib". Nərimanov Rayon Məhkəməsinin qərarı ilə şirkət 5 min manat məbləğində cərimələnib.