Tramp və Şara sanksiyaların ləğvini müzakirə etdi

Suriya Prezidenti Əhməd əş-Şara və ABŞ Prezidenti Donald Tramp arasında telefon danışığı olub.

Axar.az xəbər verir ki, bu barədə Suriya liderinin ofisi məlumat yayıb.

Bildirilib ki, liderlər ikitərəfli münasibətlər, qalan sanksiyaların ləğvi və ərəb respublikasının iqtisadi dirçəlişi perspektivlərini müzakirə ediblər.

Şara ölkənin yenidənqurma mərhələsində Suriyaya beynəlxalq dəstəyin davam etdirilməsinin vacibliyini vurğulayıb və qeyd edib ki, qalan sanksiyaların ləğvi iqtisadiyyatın dirçəldilməsi və əhalinin həyat səviyyəsinin yaxşılaşdırılması üçün zəruri şərtdir.

Suriya prezidenti həmçinin investisiyaların stimullaşdırılması və iqtisadi və infrastruktur layihələrinin iqtisadiyyatın əsas sektorlarına qayıtması üçün əlverişli şərait yaradılmasının tərəfdarı olduğunu bildirib.

Söhbət zamanı tərəflər Yaxın Şərqdə davam edən gərginlik fonunda regional təhlükəsizlik məsələlərini müzakirə ediblər.