Almaniyada iş və təhsil adı ilə DƏLƏDUZLUQ: Azərbaycanlılar necə aldadılıblar? - VİDEO

Yüksəkmaaşlı iş imkanı, eyni zamanda təhsil və viza dəstəyi... İlk baxışda diqqəti çəkən bu elanlar sonradan çox insanı peşman edir. Bu dəfə isə bənzər iddialar "Alman klubu" adlı sosial şəbəkə hesabı ilə bağlı səslənib. Baku TV-nin qaynar xəttinə müraciət edən Sənan Mustafazadə deyir ki, Almaniyada iş və təhsillə bağlı ondan külli miqdarda pul alınıb, amma vəd olunan xidmət göstərilməyib.
"Bizə Almaniyada çörək və şirniyyat sahəsi üzrə üçillik peşə təhsili təklif etdilər. Onlayn fəaliyyət göstərdiklərini və fiziki ünvanlarının olmadığını bildirdilər. Mən və yoldaşım üçün 3 600 AZN ödədik. Bir neçə ay keçdi və bizə "WhatsApp" üzərindən müqavilə göndərdilər. Müqavilədə göstərilən ixtisas qəssab idi. Bir qadın üçün qəssab işi tapıblar. Halbuki razılaşmamız belə deyildi. Bizə yalan vədlər verilib, icazəmiz olmadan istəmədiyimiz sahə üzrə müraciət edib, qəbul alıblar. Bizi hədələdilər ki, qalan ödənişi edin, yoxsa sizi məhkəməyə verəcəyik", - deyə şikayətçi bildirib.