Suriya və Dünya Bankı razılaşdı: Ölkə bərpa edilir

Suriya və Dünya Bankı ölkənin yenidən qurulmasını dəstəkləmək üçün çoxdonorlu fond yaratmaq barədə razılığa gəliblər.

Axar.az xəbər verir ki, bu barədə SANA xəbər agentliyi tərəfindən dərc edilən birgə bəyanatda bildirilir.

Sənəddə deyilir ki, Suriya Ərəb Respublikası və Dünya Bankı Qrupu Suriyanın Bərpası və Yenidənqurma Etimad Fondunun (START) yaradılması barədə razılığa gəliblər. Fond güzəştli maliyyələşdirmə, investisiya zəmanətləri və texniki dəstək təmin etmək, eləcə də ölkənin institusional potensialını gücləndirmək üçün nəzərdə tutulub.

Dünya Bankı fondu Suriya hakimiyyəti tərəfindən müəyyən edilmiş prioritetlərə uyğun olaraq donorlar və inkişaf tərəfdaşları ilə birgə idarə edəcək. Mexanizm beynəlxalq dəstəyi səfərbər etmək və iqtisadi bərpa, yenidənqurma və institusional islahatları sürətləndirmək üçün yardımı əlaqələndirmək üçün nəzərdə tutulub.

Suriyanın maliyyə naziri Məhəmməd Yasir Barniyə bildirib ki, bu saziş beynəlxalq tərəfdaşlarla əməkdaşlığın yeni mərhələsini açır:

"Biz dürüstlük, şəffaflıq, hesabatlılıq və yaxşı idarəetmənin ən yüksək standartlarına olan qətiyyətli sadiqliyimizi bir daha təsdiqləyirik".