Rusiyanın nə qədər “Kalibr” daşıyıcısı qalıb?
Son günlər Ukrayna ordusunun Novorossiyskdəki hərbi obyektlərə endirdiyi zərbələr Rusiyanın “Kalibr” qanadlı raketlərini buraxa bilən gəmilərinin sayını əhəmiyyətli dərəcədə azaldıb. Lakin bu, “Kalibr” probleminin həll olunduğu anlamına gəlmir.
Axar.az xəbər verir ki, bu barədə “Defence Expres” nəşri yazıb.
Nəşr xatırladır ki, genişmiqyaslı müharibənin əvvəlində Rusiyanın Qara dənizdə 3M14 “Kalibr” raketlərinin bir neçə tip daşıyıcısı var idi. Söhbət iki ədəd 11356R layihəli freqatdan, üç “Buyan-M” kiçik raket gəmisindən, iki 22800 layihəli “Karakurt” gəmisindən, dörd “Varşavyanka” tipli sualtı qayıqdan və bir 877V layihəli “Paltus” sualtı qayığından gedirdi. Ümumilikdə onlar 76 raketədək yaylım atəşi həyata keçirə bilərdi, baxmayaraq ki, 2022-ci ilin əvvəlində bu gəmilərin bir hissəsi hələ silahlanmaya qəbul edilməmişdi.
Qeyd olunur ki, bu qiymətləndirmə məhz Qara dənizdə yerləşən gəmilərə aid idi. Eyni zamanda Rusiya Xəzər donanmasının gəmilərindən də istifadə edirdi. Xüsusilə, 2022-ci ildə Ukrayna hərbçiləri “Velikiy Ustyuq” gəmisini vurmuş, bundan sonra zədələnmiş gəmi Volqa çayı ilə təmirə yedəyə aparılmışdı:
“Sonrakı illərdə regiondakı Rusiya raket potensialı tədricən azaldı. “Siklon” 2024-cü ildə, “Askold” isə hələ 2023-cü ildə məhv edildi. Sualtı qayıqlar arasında “Rostov-na-Donu” və “Kolpino” ciddi itkilər hesab olunur. Birinci əvvəlcə vuruldu, daha sonra batırıldı, ikinci isə SBU-nun əməliyyatı nəticəsində ciddi şəkildə zədələndi.
Novorossiyskə son zərbələr xüsusi əhəmiyyət daşıyır. Hərbi müşahidəçilərin məlumatına görə, hücum zamanı iki Rusiya freqatı — “Admiral Essen” və “Admiral Makarov” vurulub. Həmçinin “Buyan-M” tipli kiçik raket gəmilərindən biri də zədələnib, lakin onun dəqiq vəziyyəti hələlik məlum deyil”.
“Deməli, hazırda Rusiya Qara dəniz Donanmasında döyüşə hazır vəziyyətdə ən azı 5 “Kalibr” qanadlı raket daşıyıcısı qalmalıdır”, — nəşrin müəllifi qeyd edir.
Sonda qeyd olunub ki, onların sırasına iki “Buyan-M”, iki “Varşavyanka” tipli sualtı qayıq — “Starıy Oskol” və “Velikiy Novqorod” — həmçinin “Alrosa” sualtı qayığı daxildir.
Lakin “Alrosa” ilə bağlı ciddi qeydlər var. Uzunmüddətli modernləşdirmədən sonra sualtı qayıq “Kalibr” raketlərindən istifadə etmək imkanı əldə edib, amma açıq mənbələrdə onun indiyədək belə raket buraxılışı həyata keçirdiyinə dair təsdiq yoxdur. Bundan əlavə, sualtı qayığın texniki vəziyyəti də suallar doğurur: 36 illik xidməti ərzində o, ən azı 14 ili təmirdə keçirib.
