Avropada kritik vəziyyət: İttifaqın 40% ərazisi quruyur

Avropa İttifaqına daxil olan ərazilərin 38 faizində şiddətli quraqlıq qeydə alınıb. Oxu.Az xəbər verir ki, bu barədə "Euractiv" nəşri məlumat yayıb. Verilən məlumatlara əsasən, bu rəqəm özündə kənd təsərrüfatı təyinatlı torpaqların 14.8%-ni və meşə massivlərinin 14.5%-ni birləşdirir. Təbii fəlakət əsasən meşə yanğınları, kəskin istilər və yağıntı qıtlığı səbəbindən Qərbi Avropa ölkələrində daha çox hiss olunur. Nəşrin bildirdiyinə görə, mövcud vəziyyət bütün Avropa İttifaqı daxilində heyvandarlıq sahəsinə ciddi ziyan vurur. Otlaq sahələrin quruması və yem bitkilərinin məhv olması kənd təsərrüfatı işçilərini qış üçün nəzərdə tutulmuş ehtiyatlardan istifadə etməyə vadar edib. Zeytun yağı və şərab sənayesi ilə yanaşı, qarğıdalı və günəbaxan kimi mühüm yem məhsullarının yetişdirilməsi daxil olmaqla, bir çox fərqli sektorlar bu vəziyyətdən mənfi təsirlənib. Xatırladaq ki, avqustun 10-da Almaniyaya məxsus "Spiegel" jurnalı cari ilin yay aylarında Avropanın əksər hissəsini əhatə edən kəskin hava şəraitinin Aİ-nin 2026-cı il üçün planlaşdırılan iqtisadi inkişafını tamamilə ləğv edə biləcəyini vurğulamışdı. Həddindən artıq istilər nəticəsində iqtisadiyyatda yaranan problemlər Avropa İttifaqının ümumi daxili məhsulunu təqribən 1% gerilədə bilər. Bu isə təxminən 180 milyard avro məbləğində maliyyə itkisi deməkdir. ÜDM-in 0.6% azalmasına səbəb olacaq başlıca faktor kimi isə işçilərin əmək məhsuldarlığının aşağı düşməsi göstərilir.