Dünya çempionatına 33 gün qaldı: KÜRASAO - "Mavi dalğa" - VİDEO

Kürasao millisi Karib hövzəsinin son illərdə ən sürətlə inkişaf edən və maraqlı futbol layihələrindən biridir. Niderland futbol məktəbinin yetirmələri ilə güclənən bu komanda, tarixində ilk dəfə 2026-cı il dünya çempionatına vəsiqə qazanaraq böyük bir sensasiyaya imza atıb. Kürasao 2017-ci il Karib Kubokunu qazanmaq üçün Yamaykanı 2:1 hesabı ilə məğlub edərək ilk "CONCACAF Gold Cup" turnirinə vəsiqə qazanmışdı. Bu baxımdan, Yamaykaya qarşı daha bir matçın "Mavi dalğa" üçün böyük tarixi əhəmiyyət kəsb etməsi olduqca rəmzi idi. Oxu.Az Kürasao futbolunun keçmişinə, bu gününə və 2026-cı il gözləntilərinə nəzər salır. Kinqstonda keçirilən CONCACAF (KONKAKAF) seçmə mərhələsinin son oyun günündəki 0:0 hesablı heç-heçə ilə Kürasao B Qrupunda birinci yeri tutaraq dünya çempionatı 2026-ya vəsiqə qazanıb. Bu nəticə ilə onlar 150 000-dən bir az çox əhalisi və 171 kvadrat mil ərazisi ilə qlobal futbol turnirinə vəsiqə qazanan ən kiçik ölkə olaraq tarixə düşüblər.
Beynəlxalq arenada Niderland Antil adalarının xələfi olan Kürasao ilk dəfə DÇ-2014-ün seçmə mərhələlərində iştirak etmişdi. Əksər oyunçularının Niderlandda çıxış etməsinə baxmayaraq, cənub Karib adasının irsini özündə daşıyan Kürasao qısa müddətdə CONCACAF bölgəsində güclü rəqibə çevrilmişdi və 2015-ci ildə Monserratla ikioyunluq dünya çempionatı seçmə mərhələsində ilk qələbəsini qazanmışdı. Yuxarıda xatırladılan ilk "Gold Cup" vəsiqəsi və daha sonra 2019-cu ildə turnirin 1/4 finalına yüksəliş daha böyük uğurların xəbərçisi olmuşdu. Komanda hətta DÇ-2022-nin seçmə mərhələsinin sondan əvvəlki turunda Panama ilə ümumi hesabda 1:2 məğlubiyyətə qədər irəliləmişdi.
2026-cı ilin ortaq ev sahibləri olan Kanada, Meksika və ABŞ-nin bu dəfə seçmə mərhələdə iştirak etməməsi qlobal turnirə gedən yolu geniş açmış və Kürasao bundan maksimum istifadə etmişdi. Livano Komenençia və Tahit Çonq kimi gənc oyunçular həlledici anlarda özlərini göstərərək, Karib hövzəsində və bütün CONCACAF bölgəsində böyük əks-səda doğuran dünya çempionatı vəsiqəsini təmin etmişdilər.
İllər boyu Kürasao milli komandasına Remko Bisentini rəhbərlik edib. O, hazırkı heyətin böyük əksəriyyətinə milli komandada debüt şansı vermiş və onları ilk "Gold Cup" və dünya çempionatı seçmə mərhələsi qələbələrinə daşıyıb. Lakin 2024-cü ilin yanvarında dünya çempionatı təcrübəsi olan niderlandlı mütəxəssis Dik Advokatın xidmətlərindən yararlanmaq fürsəti yaranmışdı. DÇ-1994-də Niderlandı 1/4 finala aparan və DÇ-2006-da Cənubi Koreyaya rəhbərlik edən 78 yaşlı Advokat, seçmə mərhələlərdə xüsusi bir performans nümayiş etdirmişdi. Onun rəhbərliyi altında komanda on seçmə matçında heyrətamiz şəkildə 28 qol vurmuş (CONCACAF-da bütün komandalar arasında ən yaxşı nəticə) və son mərhələdə qapısından cəmi üç qol buraxmışdı. Bununla belə, təcrübəli mütəxəssis 2026-cı ilin fevralında şəxsi səbəblərə görə vəzifəsindən getmişdi. Kürasao millisinin sükanı ilk beynəlxalq təcrübəsini yaşayacaq olan həmyerlisi Fred Ruttenə tapşırılmışdı. 63 yaşlı mütəxəssis əvvəllər vətənində "Tvente", PSV, "Vitess" və "Feyenoord" klublarını çalışdırıb, həmçinin Almaniya, BƏƏ, İsrail və Belçikada da iş təcrübəsi toplayıb. Kürasao 2026-cı il dünya çempionatına necə vəsiqə qazanıb? DÇ-2022-nin son seçmə mərhələsinin bir addımlığında dayandıqdan sonra, Kürasao DÇ-2026 üçün seçmə mərhələyə rəqiblərinə şans verməyərək sürətli start götürmüşdü. İkinci mərhələni inamla keçən "Mavi dalğa", 2024-cü ilin iyununda keçirilən iki matçın ilkində Rançelo Janqanın het-triki ilə Barbadosu 4:1, ardınca isə Arubanı 2:0 hesabı ilə məğlub etmişdi. Bir il sonra, ikinci mərhələ daha möhtəşəm - Jervan Kastanyerin het-trik etdiyi Sent-Lüsiya üzərində 4:0 və Haiti üzərində 5:1 hesablı darmadağınla yekunlaşmışdı.
Seçmə mərhələnin üçüncü və sonuncu turu üçün Yamayka, Trinidad və Tobaqo və Bermud adaları kimi çətin rəqiblərlə B Qrupuna düşən Kürasao inamlı çıxışını davam etdirmişdi. Sentyabr ayı Trinidad və Tobaqoda 0:0 hesablı heç-heçə ilə başlamış, daha sonra isə evdə Bermud adaları üzərində 3:2 hesablı qələbə qazanılmışdı. Kürasao oktyabr ayında iki ev oyunu keçirmək lüksündən istifadə etmiş və Yamayka üzərində 2:0 hesablı inamlı qələbə ilə hər kəsə nə qədər iddialı olduğunu sübut etmişdi. Trinidad və Tobaqo ilə evdə 1:1 hesablı heç-heçə ilə xalları bölüşsələr də, Advokatın yetirmələri noyabr ayında Bermud adalarını 7:0 hesabı ilə məğlub etmişdilər.. Bu nəticə Yamaykadakı dramatik final matçı üçün zəmin yaratmışdı. Təcrübəli qapıçı Eloy Rum və Kürasao müdafiəsi Yamaykanın bütün hücumlarını zərərsizləşdirərək bu tarixi vəsiqəni rəsmiləşdirməyi bacarmışdılar. DÇ-2026-da Kürasaonun oyun cədvəli (Bakı vaxtı ilə) Kürasao yığması DÇ-2026-da E qrupunda Almaniya, Kot-d'İvuar və Ekvador millilərinə qarşı mübarizə aparacaq. D qrupu: 14 iyun, 21:00, Almaniya - Kürasao (Hyuston stadionu); 21 iyun, 04:00, Ekvador - Kürasao (Kanzas-Siti stadionu); 26 iyun, 00:00, Kürasao - Kot-d'İvuar (Filadelfiya stadionu).
Kürasao millisi Şimali Amerikaya sadəcə iştirak vərəqəsini imzalamağa deyil, Almaniya kimi nəhənglərdən xal qoparmağa və adını futbol tarixinə qızıl hərflərlə yazmağa gedir. Bu turnirin ən böyük sürprizi məhz bu "Mavi dalğa" ola bilər?