ABŞ-nin hərb nazirinə qarşı AĞIR İTTİHAMLAR - İmpiçment tələbi

ABŞ Konqresinin Nümayəndələr Palatasındakı demokratlar hərb naziri Pit Heqsetin impiçmenti ilə bağlı qətnamə layihəsi irəli sürürlər. Sənəddə altı ittiham əksini tapır. Oxu.Az xəbər verir ki, bu barədə "Axios" portalı məlumat yayıb. Bildirilib ki, ittihamlar arasında Konqresin razılığı olmadan İrana zərbələrin endirilməsi, ABŞ hərbçilərinin həddindən artıq təhlükəyə atılması və silahlı münaqişə qanunlarının pozulması yer alır. Demokratların fikrincə, Heqset İranda mülki əhali arasında çoxlu sayda insan itkisinə və mülki infrastrukturun dağılmasına səbəb olan əməliyyatlara icazə verib, göz yumub və ya onların qarşısını almayıb. Açıqlamada xüsusilə Minab şəhərindəki qızlar məktəbinə, eləcə də Karib dənizindəki gəmilərə edilən hücumlar vurğulanır. İttihamlardan biri məxfi məlumatlarla ehtiyatsız davranışa aiddir. Söhbət "Atlantic" nəşrinin redaktoru Ceff Qoldberqin təsadüfən Heqset və digər yüksək rütbəli ABŞ rəsmilərinin Yəmənə zərbələri müzakirə etdiyi "Signal" çatına əlavə edilən "Signalgate" qalmaqalından gedir. Müəlliflər hesab edirlər ki, Pentaqon rəhbəri məxfi və gizli məlumatlarla işləyərkən kobud səhlənkarlıq nümayiş etdirib və öz ehtiyatsız, eləcə də yersiz davranışı ilə ABŞ personalının təhlükəsizliyini riskə atıb. Heqset eyni zamanda vəzifə səlahiyyətlərindən sui-istifadədə və ictimaiyyətin Pentaqona olan inamını sarsıtmaqda günahlandırılır. "Axios" nəşrinin qeyd etdiyi kimi, qətnamənin Konqresdən keçmək şansı demək olar ki, yoxdur. Lakin bu, demokratların nazirə qarşı birləşərək, onu Donald Tramp administrasiyasında yeni əsas hədəfə çevirdiklərini göstərir. Bundan əvvəl onlar sonradan Tramp tərəfindən işdən çıxarılan sabiq daxili təhlükəsizlik naziri Kristi Noem və keçmiş baş prokuror Pem Bondinin impiçmentində israr edirdilər. Nəşr yazır ki, Heqset yeni "qorxulu fiqur" rolu üçün əsas namizəddir. "Bu, Hərb Nazirliyinin İranda prezidentin hədəflərinə qətiyyətlə və böyük ölçüdə nail olduğu bir vaxtda demokratların xəbər başlıqlarına düşmək üçün növbəti cəhdidir", - deyə Pentaqonun mətbuat katibi Kinqsli Uilson "Axios"a verdiyi açıqlamada bildirib. O, əlavə edib ki, Heqset vətəni qorumağa və güc yolu ilə sülhü bərqərar etməyə davam edəcək. Qeyd olunur ki, impiçment qətnaməsi yeddi səhifədən ibarətdir. Sənədi Konqresə seçilmiş ilk İran əsilli amerikalı, Nümayəndələr Palatasının üzvü Yassamin Ənsari (Arizona ştatından demokrat) təklif edib. Həmmüəlliflər arasında Stiv Koen (Tennessi), Jasmen Krokett (Texas), Nikema Uilyams (Corciya), Dina Titus (Nevada), Devid Min (Kaliforniya), Şri Tanedar (Miçiqan), Brittani Pettersen (Kolorado) və Sara Makbrayd (Delaver) yer alırlar.