Xaker Markın profilini sındırdı

“Mənim başqa seçimim yox idi”.

İnformasiya təhlükəsizliyi üzrə mütəxəssis Xəlil Şritex Facebook sosial şəbəkəsində istənilən bir istifadəçisinin səhifəsində material yerləşdirməyə imkan verən zəif nöqtə aşkarlayıb.

Oxu.Az RİA Novosti-yə istinadən xəbər verir ki, Xəlil Şritex (Khalil Shreateh) öz sözlərini təsdiqləmək üçün Facebook-un baş direktoru Mark Tsukerberqin səhifəsində məlumat yerləşdirib, TechCrunch yazır.

Facebook istifadəçisi sazlamalarda onun səhifəsində kimlərin material yerləşdirə biləcəyini göstərə bilər – yalnız o özü, dostları yaxud da bütün sosial şəbəkə istifadəçiləri. Mütəxəssisin Facebook-a göndərdiyi ilkin məlumatda o yazıb ki, Tsukerberqin kollecdəki rəfiqəsi Sara Qudinin səhifəsində məlumat yerləşdirə bilər. Sara Qudinin özü isə səhifəsində material yerləşdirə biləcək şəxslərin siyahısını məhdudlaşdırıb, Şritex o siyahıya daxil olmayıb.

Məlumatın gəlib çatdığı Facebook-un təhlükəsizlik komandasının əməkdaşı Qudinin dostları arasında olmadığı üçün xakerin yerləşdirdiyi məlumatı görə bilməyib.

Onda xaker səhvi nümayiş etdirmək üçün Mark Tsukerberqin şəxsi xronikasında belə bir məlumat yerləşdirib:

“Bağışla ki, sənin səhifəndə yazıların məxfiliyini pozdum. Mənim Facebook-un komandasına göndərdiyim bütün məlumatlardan sonra başqa seçimim yox idi”.

Bir neçə dəqiqə ərzində Facebook-un əməkdaşları mütəxəssislə əlaqə saxlayıblar.

Bir qayda olaraq, xakerlər Facebook-dan sosial şəbəkədəki səhvlərin aşkarlanmasına görə ən azı 500 dollar mükafat alırlar.