Rəcəb Tayyib Ərdoğan: “İraq və Suriyadakı əməliyyat təkcə hava zərbələri ilə məhdudlaşmayacaq”

“Qurudan və havadan nə lazımdırsa, etdik. Bundan sonra da etməyə davam edəcəyik”.

Bu barədə Qətər səfərindən dönən Türkiyə Prezidenti Rəcəb Tayyib Ərdoğan jurnalistlərin suallarını cavablandırarkən bildirib.

Ərdoğan İraq və Suriyanın şimal istiqamətində “Pençe Kılıç” hava əməliyyatının quru əməliyyatı ilə davam edib-etməyəcəyi ilə bağlı sualı cavablandırıb.

“Bunu asanlıqla deyə bilərəm ki, əvvəla, İraq və Suriyanın şimalındakı bu əməliyyat “kim nə deyər, necə olar” fikirləri ilə həyata keçirilən əməliyyat deyil. Əvvəl də dediyimiz kimi, əgər kimsə ölkəmizə, torpaqlarımıza narahatlıq yaradırsa, bunun əvəzini onlardan çıxacağıq. Belə ki, hazırda da cənub bölgəmizdə hücumlar planlaşdıran və ya belə hücumları həyata keçirən, təhlükə yaradan bir çox terror təşkilatları var. Bu qruplaşmalar İraq tərəfində də, Suriya tərəfində də mövcuddur.

Həmişə söylədiyim kimi, “Bir gecə anidən gələ bilərik” ifadəsini boş yerə deməmişik. Belə ki, gözlənildiyi, hazırlıqları aparıldığı və planlaşdırıldığı vaxtda da bu addımlar atıldı. Ötən gecə həyata keçirilən əməliyyat da bunun tam təzahürü idi. Çünki bu terror təşkilatlarının zərərsizləşdirilməsi və məhv edilməsi hazırda təhlükəsizlik qüvvələrimizin əvəzsiz vəzifəsidir. Həm də bu təkcə hava əməliyyatı ilə məhdudlaşmaycaq. Quru qoşunlarından nə qədər güc cəlb edilməsi ilə bağlı müvafiq bölmələrimiz, Müdafiə Nazirliyimiz və Baş Qərargahımız birlikdə qərar verəcəklər. Məsləhətləşmələr aparıldıqdan sonra müvafiq addımlar atılacaq. Burada iştirak edən dövlətlərlə də artıq diplomatik əlaqələrimiz qurulub, addımlarımızı da buna uyğun olaraq atmışıq və atmağa da davam edirik”, – deyə Türkiyə prezidenti qeyd edib.

Rəcəb Tayyip Ərdoğan vurğulayıb ki, hava və quru əməliyyatları ilə bağlı bütün mümkün tədbirlər görüləcək.

“Qurudan və havadan nə lazımdırsa, etdik. Bundan sonra da etməyə davam edəcəyik”, – deyə Ərdoğan bildirib.

Mənbə: Hürriyet

Rəylər

OXŞAR XƏBƏRLƏR