Bakı-Yeni Dehli: Müsbət siqnallar və əməkdaşlıq üçün yeni imkanlar

Prezident İlham Əliyevin Hindistanın xarici işlər naziri Subrahmanyam Cayşankarı qəbul etməsi Bakı ilə Yeni Dehli arasında siyasi dialoqun fəallaşdığını göstərən mühüm siqnaldır. Yüksək səviyyəli təmasların davam etdirilməsi münasibətlərin möhkəmləndirilməsi, enerji, investisiya, texnologiya və turizm sahələrində əməkdaşlığın genişləndirilməsi üçün əlverişli zəmin yaradır. Hindistan diplomatiyasının rəhbəri Azərbaycana Baş nazir Narendra Modinin tapşırığı ilə səfər etdiyini bildirib. Qəbul zamanı iki ölkə liderinin Bişkekdəki təmasları da xatırlanıb. Bu ardıcıllıq ikitərəfli münasibətlərin inkişafına göstərilən diqqətin ifadəsidir. Azərbaycan qarşılıqlı hörmətə, bərabərhüquqluluğa və ortaq maraqlara əsaslanan konstruktiv dialoqun tərəfdarıdır. Bu yanaşma hər bir ölkə ilə əməkdaşlıq üçün imkanlar açır. Hindistanla təmasların inkişafı da tərəfdaşlığın perspektivlərini konkret müzakirə etməyə və hər iki tərəfə fayda verəcək istiqamətləri müəyyənləşdirməyə imkan yaradır. Xalqları birləşdirən tarixi bağlar Azərbaycanla Hindistan arasında əlaqələr qədim tarixə malikdir. Qədim sivilizasiyaları təmsil edən iki xalq əsrlər boyu ticarət və mədəni təmaslar qurub. Bu münasibətlərin izləri Azərbaycanda bu gün də qorunur. Hind mənşəli yazıların olduğu Atəşgah məbədi həmin əlaqələrin nümunələrindən biridir. Bu abidə ticarət və mədəni mübadilə sayəsində formalaşmış tarixi bağları xatırladır. Həmin irs bu gün humanitar əməkdaşlıq və xalqların bir-birinə marağının güclənməsi üçün əlavə əsasdır. İqtisadi maraqlar möhkəm zəmin yaradır Müasir münasibətlərin konkret iqtisadi dayaqları var. Hindistanın "ONGC Videsh" şirkəti "Azəri-Çıraq-Günəşli" yataqlar blokunun işlənməsində və Bakı-Tbilisi-Ceyhan neft kəməri layihəsində iştirak edir. Bu layihələrdə tərəfdaşlıq iki ölkəni uzunmüddətli iqtisadi maraqlarla birləşdirir. İnvestisiya istiqaməti də diqqətəlayiqdir. Son investisiya forumunda Azərbaycana ümumilikdə 125 milyon dollar həcmində sərmayə yatıran şirkətlər arasında Hindistan şirkəti də yer alıb. Bu iştirak Hindistan biznesinin Azərbaycan bazarına marağını göstərir. İşgüzar təmasların genişləndirilməsi yeni birgə təşəbbüslərə yol aça bilər. Siyasi dialoq isə investisiya imkanlarının müzakirəsi və şirkətlər arasında tərəfdaşlığın qurulması üçün əlverişli şərait yaradır. Energetikadan rəqəmsal texnologiyalara Əməkdaşlıq potensialı neft-qaz sektoru ilə məhdudlaşmır. Hindistan informasiya texnologiyaları və rəqəmsal infrastrukturun inkişafı sahəsində böyük təcrübəyə malikdir. Rəqəmsallaşma və iqtisadiyyatın şaxələndirilməsi hədəflərini həyata keçirən Azərbaycan üçün bu sahələrdə əməkdaşlıq praktiki maraq doğurur. Proqram təminatının hazırlanması, elektron xidmətlər, mütəxəssis hazırlığı və texnoloji təcrübə mübadiləsi tərəfdaşlığın perspektivli istiqamətlərinə çevrilə bilər. Bu sahələrin inkişafı mövcud iqtisadi əlaqələri yeni layihələrlə tamamlamağa imkan verər. Turizm insanları yaxınlaşdırır, biznes üçün imkanları artırır Turizm də yaxşı perspektivlərə malik sahələrdəndir. Azərbaycanın tarixi məkanları, təbiəti və mədəni müxtəlifliyi Hindistandan turistlərin cəlb edilməsi üçün imkanlar yaradır. Birbaşa hava əlaqələri səfərləri asanlaşdırır və təmasların inkişafına kömək edir. Turist axınının artması hotellər, restoranlar, nəqliyyat şirkətləri və xidmət sektorunun digər iştirakçıları üçün əlavə imkanlar deməkdir. Qarşılıqlı səfərlər insanların bir-birinin mədəniyyətini və ənənələrini daha yaxından tanımasına da şərait yaradır. Turizm marşrutlarının birgə tanıdılması və müvafiq şirkətlər arasında əlaqələrin möhkəmləndirilməsi bu istiqamətə əlavə dinamika qazandıra bilər. Beynəlxalq gündəlikdə ortaq mövzular Beynəlxalq səviyyədə də əməkdaşlıq imkanları mövcuddur. Qlobal Cənubun gündəliyi, dayanıqlı inkişaf, iqlim dəyişmələri, enerji təhlükəsizliyi və texnologiyalara çıxış məsələləri Azərbaycanla Hindistan arasında dialoq üçün imkanlar yaradır. Hindistan dünya siyasətində və iqtisadiyyatında mühüm yer tutur. Azərbaycan isə energetika və regional nəqliyyat əlaqələrinin təmin olunması sahəsində əhəmiyyətli imkanlara malikdir. Münasibətlərin inkişafı hər iki ölkənin maraqlarına cavab verir və bu potensialdan daha geniş istifadə etməyə şərait yaradır. Cayşankarın Bakı səfəri bu istiqamətdə müsbət addım kimi qiymətləndirilə bilər. Siyasi dialoqun davam etdirilməsi, işgüzar əməkdaşlığın genişləndirilməsi və insanlar arasında təmasların möhkəmləndirilməsi münasibətlərə yeni praktiki nəticələr qazandıra bilər. Aqil Vəlili