Onlayn alış-veriş edənlər üçün yeni qayda

Azərbaycanda "Elektron ticarət haqqında" Qanunun əhatə dairəsinin genişləndirilməsi nəzərdə tutulur. Oxu.Az-ın məlumatına görə, sözügedən məsələ parlamentin İqtisadi siyasət, sənaye və sahibkarlıq komitəsinin bugünkü iclasında müzakirəyə çıxarılan "Elektron ticarət haqqında" Qanuna təklif edilən dəyişiklik layihəsində əksini tapıb. Sənədə əsasən, elektron ticarətlə məşğul olan satıcılar alıcıların POS-terminal, elektron pul kisəsi və digər vasitələrlə aparılan nağdsız ödənişlər barədə məlumatlarla tanış olmasına imkan yaratmalı olacaqlar. Elektron ticarət çərçivəsində malların (işlərin, xidmətlərin) dəyərinin nağdsız ödənilməsi ödəniş xidməti təchizatçıları vasitəsilə həyata keçiriləcək. Qanun layihəsinə əsasən, satıcı (təchizatçı) ödəniş üsulları (o cümlədən nağdsız ödənişlərin POS-terminal, elektron pul kisəsi və ya digər vasitələrlə aparılması) barədə məlumatlarla alıcıların (sifarişçilərin) və səlahiyyətli dövlət orqanlarının tanış olmasına imkan yaratmalıdır. POS-terminal nağdsız ödənişlərin (o cümlədən təmassız ödənişlərin) aparılması və (və ya) nağd pul vəsaitinin alınması üçün nəzərdə tutulmuş avadanlıq, o cümlədən lazımi proqram təminatı ilə təmin edilmiş mobil cihaz (mobil operatorların ümumistifadəli telekommunikasiya şəbəkələrində mobil (sellülar) xidmət alan (xidmət almağa yararlı olan) telefon aparatı və digər son avadanlıq) hesab ediləcək. Alıcının (sifarişçi) sifariş verməzdən əvvəl satıcı (təchizatçı) tərəfindən təmin olunduğu məlumatlar elektron sənəd formasında təsdiqlənmə vasitəsilə müqavilə bağlananadək alıcıya (sifarişçiyə) çatdırılmalıdır. Bununla yanaşı, elektron ticarətin hüquqi tənzimlənməsi həmçinin texnoloji neytrallıq prinsipinə də əsaslanacaq. Texnoloji neytrallıq dedikdə elektron ticarət münasibətlərində bu sahədəki normativ hüquqi aktlarla hər hansı bir texnologiyanın üstün tutulmaması, tətbiqində məhdudiyyətlərin qoyulmaması və müxtəlif texnoloji həllərin bərabər qəbul olunması nəzərdə tutulacaq. Bundan əlavə, "Elektron ticarət haqqında" Qanunun yalnız ölkə ərazisində həyata keçirilən elektron ticarətə tətbiqini nəzərdə tutan müddəa (məhdudiyyət) ləğv ediləcək. Bu qanunda istifadə olunan digər anlayışlar Azərbaycan Respublikasının normativ hüquqi aktları ilə müəyyən edilmiş mənaları ifadə edəcək.